વાર્તા શિબિર શ્રુંખલા અને આ બ્લોગ વિષે

~~ વારતાલેખન શિબિર શ્રુંખલા અને આ બ્લોગ વિષે ~~

ગુજરાતી લેક્સિકોન અને ભગવદ્ગોમંડળમાં વાર્તાલેખન શબ્દનો આ અર્થ આપેલો છે

વાર્તાલેખન: વાર્તા લખવી તે....

એનો સહજ અને સરળ અર્થ કરીએ તો કોઈ એક ઘટેલી કે પછી ન ઘટેલી ઘટના કે બીનાનું (આ)લેખન કે ચિત્રણ કરવું.. આ ચિત્રણ કરતી વખતે એમાં કલ્પનાનાં રંગ ઉમેરવા, ભાવારોપણ કરવું અને એ દ્વારા સીધીસાદી ઘટનામાં રસ નિષ્પન્ન કરવો. લેખક જ્યારે પોતાના લેખનમાં 'પોતાપણું' ઉમેરે છે ત્યારે જઈને એ આલેખાયેલી ઘટના  વાર્તા બને છે અને લેખકને એક પાયદાન ઉપર લઇ જાય છે,એને 'સર્જક' બનાવે છે!

અહીં આપણે સહુ સાથે મળીને આપણી અંદરનાં એ 'સર્જકપણાં'ને શોધવાનો આયામ આદરીશું.

મિત્રો, ટૂંકી વાર્તા હોય કે લઘુકથા, અભિવ્યક્તિનું આ માધ્યમ અંધારી ગુફા જેવું છે. આ ગુફામાં ઘણાં રત્નો વેરાયેલાં પડ્યાં છે. ગુફાને પાર કરવા એક નિશ્ચિત સમયમર્યાદા આપવામાં આવી હોય છે અને એક છેડા થી બીજા છેડા સુધીનું આ અંતર આપણે એ નિશ્ચિત સમયમાં પાર કરવાનું હોય. સાથે સાથે ગુફામાંથી રત્નો પણ શોધવાનાં હોય છે. એ માટે આપણને એક મશાલની જરૂરત પડવાની. અહીં આપણે એ મશાલ બનાવતાં શીખીશું. એકબીજાનાં સહયોગથી! જ્ઞાનનાં વિનિયોગથી! તમને 'બાર્ટર સિસ્ટમ' યાદ છે મિત્રો? અહીં  એ જ અપ્લાય કરવાની છે.

"જે મારી પાસે છે એ હું તને આપીશ અને તારી પાસે જે છે એ તું મને આપજે."

આ વિનિયોગથી જે તત્વો મળશે એ આપણું અચીવમેંટ. એ તત્વોમાંથી આપણે પોતપોતાની મશાલ બનાવવાની છે.. તત્વ જેટલું ઉમદા હશે મશાલ એટલી જ ટકાઉ બનશે અને ભરપૂર અજવાળું આપશે. શરૂઆતી પ્રયત્નોમાં એવું  બને કે કદાચ મશાલ બરાબર ન બને અને સરખી પ્રગટે નહીં.... પણ આપણે ફરી, ફરીબનાવીશું.... સમય સાથે હથોટી આવતી જશે અને ક્રમશ: કામ સુધરતું જશે. આ બ્લોગ, આ ફોરમ એ પ્રક્રિયા સતત ચાલતી રહે એ માટે ઇંધણ પૂરું પાડશે.

આવો, અહીંથી 'તણખો' લઈએ અને પોતાની મશાલ પ્રજવલ્લિત કરીએ...

વાર્તા એક અવાજ હોય તો આ બ્લોગ કાન છે.....માઈક છે.... સ્પીકર છે.... હોંકારો છે.... અવાજનું ગતિમાપક યંત્ર છે!

વાર્તા એક અવાજ હોય તો એના સ્વર અને સૂર સંતુલિત કરવાની કાર્યશાળા અને એ કાર્યશાળાનું રજીસ્ટર છે આ બ્લોગ!

અસ્તુ.